Grindavík sigraði Val í 28. umferð Dominos deildar kvenna fyrr í kvöld, á heimavelli sínum í Röstinni, með 80 gegn 77 stigum.
Leikurinn sem slíkur, hrein úrslit um hvort liðið kæmist upp í fjórða sæti deildarinnar og þar með, inní úrslitakeppnina þetta árið.
Fyrir leikinn höfðu þessi lið mæst þrisvar áður í vetur. Sá fyrsti fór fram í Grindavík þann 12. nóvember síðastliðinn og endaði hann með 8 stiga (81-89) sigri gestana úr Val. Annar leikurinn fór fram þann 17. desember að Hlíðarenda og endaði með 6 stiga (71-77) sigri Grindavíkur. Síðasti leikur þessara liða fór einnig fram að Hlíðarenda þann 14. febrúar og endaði hann með 14 stiga sigri heimastúlkna í Val.
Munurinn í deild aðeins 2 stig fyrir þennan leik (Grindavík 32 – Valur 30), en þar sem að Valur var yfir í innbyrðis seríu liðanna fyrir þennan leik (2-1), dugði þeim aðeins sigur í þessum leik, líkt og Grindavík reyndar, til þess að komast í úrslitakeppni þessa árs.
Fyrri hálfleikur þessa leiks var að miklu leyti í járnum, þar sem að Valur í heildina þó, tók skrefin á undan. Fyrsti leikhlutinn endaði þó með 2 stiga forystu heimastúlkna (23-21), en þegar liðin héldu til búningsherbergja í hálfleik hafði það svo snúist við. Gestirnir af Hlíðarenda þá komnir með 4 stiga (39-43) forystu (sem hefði, þó, verið meiri ef Petrúnella hefði ekki sett tvær neðan úr bæ rétt fyrir lok hálfleikssins)
Taleya Mayberry var atkvæðamest gestana í hálfleik með 18 stig og 3 fráköst. Fyrir heimastúlkur var það hinsvegar Petrúnella Skúladóttir sem dróg vagninn með 13 stigum (5/10 af vellinum) og 3 fráköstum.
Eitthvað hefur ræða fyrrum varnarjaxlsins Sverris Þórs, þjálfara Grindavíkur, virkað á lið hans í hálfleik. Því eftir hléið virtust heimastúlkur mæta mun stemmdari varnarlega heldur en þær höfðu áður sýnt af sér í leiknum. Náðu að halda Val í litlum 11 stigum í 3. leikhlutanum og með því leggja nokkuð vel upp fyrir lokaleikhlutann (57-54)
Grindavík náði svo að byggja á það enn frekar í þeim 4., hægt en bítandi, juku þær við forystuna. Voru mest komnar í 8 stiga forystu í leikhlutanum. Valur náði þó að skera það forskot niður í lokin og gera þetta að virkilega spennandi leik.
Lokamínútur – Grindavík gegn Val:
Því ljóst að Grindavík mætir deildarmeisturum Snæfells í fyrstu umferð úrslitakeppni Dominos deildar kvenna á meðan að Valur, þrátt fyrir hetjulega baráttu, þarf að sætta sig við að fara í sumarfrí.
Maður leiksins var leikmaður Grindavíkur, Petrúnella Skúladóttir, en hún skoraði 28 stig, gaf 10 stoðsendingar á þeim 34 mínútum sem hún spilaði í leik kvöldsins.
Umfjöllun,myndir,viðtöl/ Davíð Eldur
Grindavík-Valur 80-77 (23-21, 16-22, 18-11, 23-23)
Grindavík: Petrúnella Skúladóttir 28/10 fráköst, Kristina King 18/7 fráköst/7 stoðsendingar, Pálína María Gunnlaugsdóttir 18/9 fráköst, Lilja Ósk Sigmarsdóttir 7/6 fráköst, Guðlaug Björt Júlíusdóttir 4/5 fráköst, Ingibjörg Jakobsdóttir 3/4 fráköst, Jeanne Lois Figeroa Sicat 2/5 stoðsendingar, Berglind Anna Magnúsdóttir 0, Katrín Ösp Rúnarsdóttir 0, Hrund Skuladóttir 0, Jóhanna Rún Styrmisdóttir 0, Elsa Katrín Eiríksdóttir 0.
Valur: Taleya Mayberry 28/5 fráköst, Ragna Margrét Brynjarsdóttir 16, Kristrún Sigurjónsdóttir 11/7 fráköst, Sara Diljá Sigurðardóttir 8/5 fráköst, Guðbjörg Sverrisdóttir 7/13 fráköst/7 stoðsendingar, Ragnheiður Benónísdóttir 7/5 fráköst, Bylgja Sif Jónsdóttir 0, Margrét Ósk Einarsdóttir 0, Sóllilja Bjarnadóttir 0, Regína Ösp Guðmundsdóttir 0.
Dómarar: Einar Þór Skarphéðinsson, Davíð Tómas Tómasson
