Stjörn körfuknattleiksdeildar Snæfells hefur sent frá sér yfirlýsingu þar sem hún fagnar niðurstöðu aganefndar KKÍ í máli Sveins Arnars Davíðssonar en honum var á dögunum gert að sök að hafa sparkað í höfuð liggjandi leikmanns í viðureign KFÍ og Snæfells í Domino´s-deild karla. Harmar stjórnin upphlaup vegna meints atviks og sömuleiðis þann leiðindafréttaflutning sem málið hlaut.
Stjórn körfuknattleiksdeildar Snæfells fagnar niðurstöðu aganefndar KKÍ þar sem að Sveinn Arnar Davíðsson er laus allra mála eftir að hafa verið kærður af dómara leiks Snæfells gegn KFÍ.
Við hörmum upphlaup vegna meints atviks og sömuleiðis þann leiðindarfréttaflutning sem málið hefur hlotið. Það er sorglegt hvernig málið var sett upp og staðhæfingar um að leikmaðurinn hafi „ viljandi sparkað „ í höfuð leikmanns KFÍ en ásetningur leikmanns Snæfells var enginn í þessu atviki.
Þess í stað hefðu allir aðilar getað fengið umfjöllun um magnaðan leik tveggja góðra liða þar sem að leikmenn skoruðu glæsilegar 3 ja stiga körfur og síðan tryggði leikmaður Snæfells liðinu framlengingu með ótrúlegri körfu langt utan af velli og í kjölfarið lönduðu Snæfellsmenn góðum sigri.
Við fögnum því að málinu er lokið og allir málsaðilar geta þvi haldið áfram að gera sitt besta á körfuboltavellinum.
Baráttan framundan er skemmtileg og skorum við á fjölmiðla að fjalla ítarlega um körfuna á jákvæðan hátt .?
Bestu körfuboltakveðjur,
Stykkishólmi 15. febrúar 2013?Stjórn kkd Snæfells
