10:45
{mosimage}
Skallagrímur er enn án þjálfara þótt nokkuð langt sé um liðið frá því deildinni lauk. Borgnesingar eru þó ekki þjálfaralausir að eigin vilja heldur gengur ekkert að fá mann í starfið. Frá þessu er greint á www.visir.is
„Það virðist vera vonlaust að fá Íslending í starfið. Ég held við höfum talað við eina átta Íslendinga um starfið en það skilaði okkur engu," sagði Hafsteinn Þórisson, sem er nýtekinn við sem formaður körfuknattleiksdeildarinnar og verður ekki sagt að hveitibrauðsdagarnir hafi verið eftirminnilegir.
Valur Ingimundarson hætti sem kunnugt er störfum sem þjálfari liðsins eftir síðustu leiktíð. Hann gæti þó þurft að halda áfram finnist enginn þjálfari þar sem hann á eitt ár eftir af samningi sínum.
„Við skulum vona að til þess komi ekki enda viljum við ekkert vera að pína mann til að þjálfa áfram sem er orðinn þreyttur og vill taka sér smá frí," sagði Hafsteinn. En hver eru næstu skref?
„Við erum að þreifa fyrir okkur utan landsteinanna og gengur ágætlega. Vonandi getum við tilkynnt um nýjan þjálfara fljótlega."
Fréttablaðið í dag – www.visir.is
