Sterkur útisigur hjá Jamtland í sænsku

Þrjú Íslendingalið voru á ferðinni í sænsku úrvalsdeildinni í körfuknattleik í gærkvöldi. Brynjar Þór Björnsson og félagar í Jamtland Basket unnu sterkan útisigur á Norrköping Dolphins og meistarar Sundsvall Dragons lögðu botn lið ecoÖrebro en Helgi Magnússon og félagar í 08 Stockholm HR máttu þola stórt tap á heimavelli.

Jakob Örn Sigurðarson fór fyrir Sundsvall með 28 stig, 4 stoðsendingar, 3 fráköst og 2 stolna bolta. Hlynur Bæringsson lét ekki sitt eftir liggja og splæsti í tvennu með 17 stig og 11 fráköst og þá var Pavel Ermolinski einnig með tvennu, 11 stig og 11 stoðsendingar og ekki fjarri þrennunni þar sem hann tók einnig 7 fráköst. Með sigrinum er Sundsvall í 2. sæti deildarinnar.

 

Brynjar Þór Björnsson gerði 9 stig í liði Jamtland og tók 3 fráköst. Brynjar hefur oft verið heitari og setti aðeins 1 af 5 í þristum þennan leikinn en stigin tvö skiluðu sér í hús hjá Jamtland engu að síður. Þrátt fyrir sigurinn er Jamtland engu að síður í níunda og næstneðsta sæti deildarinnar með 14 stig, 4 stigum á eftir Solna Vikings í 8. sæti.

 

Helgi Magnússon gerði 5 stig í liði 08, tók 4 fráköst og gaf 1 stoðsendingu. Eftir leikinn í gær er 08 í 7. sæti deildarinnar með 20 stig.

 

Annað kvöld verður Brynjar Þór á ferðinni með Jamtland þegar liðið tekur á móti toppliði LF Basket og er það síðasti leikur liðsins á árinu en 08 Stockholm, Sundsvall og Solna Vikings leika ekki aftur fyrr en á nýju ári.