Hér fyrir neðan eru nokkur af þeim atriðum sem Körfunni hafa borist til eyrna á síðustu dögum er varða leikmenn, þjálfara og félög á Íslandi. Tekið skal fram að hér er um að ræða óstaðfestar fregnir og því ber að taka þeim sem slíkum.
- Samkvæmt mjög háværum orðrómi eru verðandi meistarar Tindastóls búnir að bjóða Styrmi Snæ Þrastarsyni samning fyrir næsta tímabil, en samkvæmt orðinu myndi sá samningur gera hann að launahæsta íslenska leikmanni deildarinnar
- Sú saga flýgur einnig fjöllum hærra að leikmaður Njarðvíkur Haukur Helgi Pálsson muni semja við Stjörnuna fyrir komandi tímabil
- Þá er talið næsta öruggt að Stjarnan sé búin að ganga frá samningum við leikmann HLA Alicante Ægir Þór Steinarsson, en hann á að hafa neitað tilboðum frá Val, Haukum og Tindastóli
- Þá gengur sá orðrómur að Stjarnan hafi haft samband og vilji semja við leikmann Njarðvíkur Mario Matasovic fyrir næsta tímabil
- Ekki er talið líklegt að Helgi Magnússon muni halda áfram með KR á næsta tímabili, en þeir sem nefndir hafa verið sem mögulegir arftakar hans eru Jakob Sigurðarson, Hjalti Vilhjálmsson og Hörður Unnsteinsson
- Þá er orðið á götunni að bakvörður Keflavíkur Hörður Axel Vilhjálmsson sé á leiðinni frá félaginu, samkvæmt orðrómi er Stjarnan talin líklegur áfangastaður, sem og er sagt að Grindavík hafi gríðarlegan áhuga á að fá hann í sínar raðir
- Þá er sá orðrómur í gangi að Finnur Freyr Stefánsson þjálfari Vals sé líklegur til þess að taka fund með Keflavík eftir að tímabil hans endar hjá Val í Subway deild karla
- Fyrrum þjálfari Selfoss Chris Caird er sagður vera undir smásjánni hjá Fjölni, en ekki er víst að Borche Ilievski haldi áfram með liðið
- Leikmaður Selfoss Ísar Freyr Jónsson sem sagður var á leið heim í KR fyrir næsta tímabil er nú einnig sagður líklegur til þess að ganga í raðir Njarðvíkur
- Leikmaður Hauka Jana Falsdóttir er talin líkleg til þess að líta í kringum sig eftir að samningur hennar við Hauka rennur út nú eftir þetta tímabil og eru Fjölnir og Valur taldir líklegir áfangastaðir fari svo að hún yfirgefi Hafnarfjörðinn
- Þá er annar leikmaður Selfoss, Ísak Júlíus Perdue, talinn líklegur til þess að ganga til liðs við Hamar eða Þór í Subway deildinni
- Fyrrum þjálfari Þórshamars í fyrstu deild kvenna Hallgrímur Brynjólfsson er talinn líklegur til þess að taka við Fjölni í Subway deild kvenna fyrir næsta tímabil
- Þá er talið að Hamar leggji nú allt í sölurnar til þess að tryggja sér samning við Sigvalda Eggertsson úr ÍR fyrir komandi tímabil, en þá er einnig sagt að Haukar og Álftanes séu á höttunum eftir starfskröftum hans
- Falllið ÍR úr Subway deild karla er sagt vera á höttunum eftir Viktori Mána Steffensen leikmanni Fjölnis
- Þá er ÍR einnig sagt vera á eftir leikmanni Stjörnunnar Ingimundi Orra Jóhannssyni
- Anna Lára Ásgeirsdóttir er sögð mögulega vera á leið heim úr bandaríska háskólaboltanum aftur í raðir Njarðvíkur, þar sem hún vann Íslandsmeistaratitil á síðasta tímabili
- Eftir fremur snubbóttan endi á tímabili Njarðvíkur er talið að leikmaður þeirra Oddur Rúnar Kristjánsson yfirgefi félagið í sumar, heimkoma í KR eða samningur við Stjörnuna eru taldir líklegir áfangastaðir fyrir bakvörðinn knáa
- Einn eftirsóttasti leikmaður fyrstu deildarinnar þetta sumarið virðist vera Hilmir Arnarson úr Fjölni, en unglingalandsliðsleikmaðurinn er sagður hafa fengið símtöl og fundarboð frá flestum liðum Subway deildarinnar eftir að tímabilið kláraðist
- Einn eftir sóttasti leikmaður Subway deildarinnar er hinsvegar leikmaður Blika Sigurður Pétursson, en hann er talinn líklegur til þess að ganga til liðs við Álftnesinga, Hauka eða Val fyrir næsta tímabil
- Nýliðar Stjörnunnar í Subway deild kvenna eru sagðar á eftir einum besta leikmanni deildarinnar á síðasta tímabili miðherja Íslandsmeistara Vals og íslenska landsliðsins Ástu Júlíu Grímsdóttur
- Þá er Stjarnan einnig sögð á eftir hinni efnilegu Emmu Hrönn Hákonardóttur sem átti flott tímabil með Þórshamri í fyrstu deildinni á nýafstöðnu tímabili
- Leikmenn Keflavíkur Arnór Sveinsson og Magnús Pétursson eru taldir líklegir til þess að semja við nýliða Þróttar Vogum í fyrstu deildinni fyrir komandi tímabil
Orðið á götunni er einungis til gamans og ef fólk hefur ábendingar um slúður skal hafa samband á [email protected]
