Jón Arnór Stefánsson og félagar í Unicaja Malaga endurheimtu toppsætið í ACB deildinni í kvöld með sigri á Movistar Estudiantes á heimavelli. 66:62 varð lokastaða leiksins og eins og stigaskorið sýnir þá var varnarleikur í hávegum hafður og skotnýting í samræmi við það. Nema hvað að Estudiantes héldu sér kannski við efnið þetta kvöldið með ágætri hittni fyrir utan þriggjastiga línuna (40%) Eftir að hafa leitt með fjórum stigum í hálfleik misstu Malagamenn niður það forskot í 1 stig fyrir síðasta leikhlutann en sigruðu á lokametrunum með fjórum stigum.
Jón Arnór spilaði sínar 14 mínútur í leiknum og skoraði 6 stig, hitti úr 3 af 4 skotum sínum og sendi eina stoðsendingu. Með sigrinum eru Malaga aftur komnir á topp ACB deildarinnar en á morgun leika Real Madrid og Barcelona í körfuboltaútgáfunni af El Clássico og nokkuð ljóst að annað liðið mun þá jafna Malaga að stigum.
