Lið Los Angeles Lakers sem tilbúið er að selja nánast sálu félagsins fyrir einn leikmann voru í nótt niðurlægðir í heimsókn þeirra til Indiana. 136:94 varð niðurstaða kvöldsins og 42 stiga tap er það stærsta sem Lebron James hefur þurft að þola á sínum ferli. Lebron skilaði 18 stigum og 9 stoðsendingum í nótt. Indiana er á ágætu róli þrátt fyrir að hafa misst Victor Oladipo í meiðsli út tímabilið en það var Myles Turner sem var þeirra besti maður í gær með 22 stig. Hverju skal um kenna er óvitað en þó líklegt að rótið í kringum liðið síðustu daga vegna Anthony Davis og mögulegra vistaskipta hans hafi mikið að segja. Mögulega að sálin úr liðinu hafi þá þegar verið farin til New Orleans.
Á hinum enda Bandaríkjana halda Boston Celtics áfram að skila sigrum og hafa nú tekið 5 í röð. Í nótt sigruðu Boston menn fyrrum lið Lebron James, Cleveland með 103 stigum gegn 96. Jason Tatum fór mikinn og skoraði 25 stig og tók 7 fráköst í leiknum fyrir Boston á meðan Collin Sexton skoraði 27 stig fyrir Cleveland.
Annars fóru önnur úrslit þannig:
Philadelphia – Toronto 107:119
Charlotte – LA Clippers 115:117
New York – Detroit 92:105
Memphis – Minnesota 108:106
Oklahoma – Orlando 132:122
Portland – Miami 108:118
