LF og Solna í frí með sigur

Íslendingaliðin í Svíþjóð eru nú komin í jólafrí en Sundsvall Dragons og LF Basket léku í gærkvöldi sína síðustu leiki fyrir jól. Solna Vikings kláruðu sín mál fyrr í vikunni með stórsigri gegn ecoÖrebro. LF vann einnig í gærkvöldi en Sundsvall fékk skell í toppslagnum.

 

 

Sundsvall heimsótti Norrköping Dolphins þar sem höfrungarnir fóru með 118-85 sigur af hólmi! Hlynur Bæringsson gerði 11 stig, tók 11 fráköst og gaf 4 stoðsendingar í liði Sundsvall og Jakob Örn Sigurðarson bætti við 10 stigum og 3 fráköstum. Þá var Ægir Þór Steinarsson með 7 stig og Ragnar Nathanaelsson bætti við 2 stigum. Södertalje og Uppsala mætast í dag í lokaleik deildarinnar fyrir jól þar sem Södertalje getur jafnað Sundsvall að stigum eða Uppsala skotið sér á toppinn með Norrköping.

 

Boras var ekki mikil fyrirstaða fyrir LF í gærkvöldi, lokatölur 88-70 þar sem Haukur Helgi Pálsson gerði 12 stig og tók 2 fráköst í liði LF sem er fyrir lokaleik deildarinnar í dag ásamt Boras og Södertalje 4.-6. sæti með 20 stig.

 

Jólafríið verður ekki langt en LF og Sundsvall mætast þann 29. desember en þann sama dag mætast ecoÖrebro og Solna Vikings svo landsliðsmennirnir í Svíaaríki verða að öllum líkindum ekki grimmir á því tvíreykta.