Leikir dagsins: Flottur fimmtudagur í vændum

Í kvöld hefst sautjánda umferðin í Domino´s deild karla. Með kvöldinu í kvöld eru alls 12 stig eftir í pottinum og KR með 6 stiga forystu á toppi deildarinnar. Botnliðin þrjú, Fjölnir, Skallagrímur og ÍR, sem nú eiga í blóðugri baráttu fyrir lífi sínu í deildinni spila öll í kvöld en aðeins eitt þeirra á heimavelli þegar ÍR tekur á móti Keflavík.

 

 

*Einn leikur er í 1. deild karla í kvöld en þá tekur Hamar á móti Breiðablik kl. 19:15. Allir leikir dagsins.

 

 

ÍR – Keflavík

Njarðvík – Grindavík

KR – Snæfell

Stjarnan – Skallagrímur

Tindastóll – Fjölnir

 

Aðeins fimm stig skildu liðin að í fyrri leiknum sem Keflavík vann 87-82. Keflvíkingum hefur ekkert gengið á útivelli undanfarið og tapað síðustu fimm útileikjum sínum. Keflavík er á meðal liða í miðjugraut deildarinnar þar sem sigur eða tap getur sent þig um óravíddir en ÍR þarf nauðsynlega á sigri að halda með 6 stig á botni deildarinnar.

 

Njarðvíkingar eru heitasta lið deildarinnar um þessar mundir, eru á lengsta „rönn-inu“ með fjóra sigra í röð. Fyrri viðureign liðanna fór 74-85 fyrir Njarðvík þegar liðin áttust við í Röstinni í Grindavík. Gulir Grindvíkingar eru að koma af súru tapi gegn KR í Röstinni þar sem allt gekk á afturfótum hjá heimamönnum á lokasekúndum leiksins.

 

Lengjan fer ekki mjúkum höndum um Hólmara, gefur þeim stuðulinn 3,6 á meðan KR fær 1,05. KR hefur eins og flestir vita ekki tapað leik á heimavelli í vetur og verma toppinn en Hólmarar eru í 6. sæti með 16 stig. Fyrri leikur liðanna á tímabilinu var ekki amalegur, fór 91-99 í Stykkihólmi þar sem KR-ingar léku í Snæfellsbúningum, ætli þeir röndóttu muni eftir treyjunum í kvöld? Við á Karfan.is biðjum hér með Martin Hauksson að halda sínum strákum við efnið…mögulega verður Ingi Þór með varabúninga úr Hólminum til að hlaupa undir bagga með uppeldisklúbbnum sínum ef þarf.

 

Borgnesingar fara ekki í Höllina í ár þökk sé Stjörnunni, sú staðreyndi ætti að vera Skallagrímsmönnum næg ástæða til að gera svaðalegan leik í Ásgarði. Bikarleikurinn var jafn og spennandi þar sem Stjarnan hafði betur en Skallagrímur vann fyrri deildarleikinn í Fjósinu 94-85.

 

Stólarnir mættu í Dalhús og skelltu Fjölni 80-98 í fyrri viðureign liðanna á tímabilinu. Fjölnismenn komust í stutt var frá botni deildarinnar með sigri á Skallagrím í síðustu umferð og þjálfarinn var brattur eftir leik. Nú fara Fjölnismenn yfir heiðar og norður í Skagafjörð og við sjáum hversu brattir þeir verða í rimmunni gegn Tindastól á erfiðasta útivelli landsins.