14:05
{mosimage}
Fjórði undanúrslitaleikur Njarðvíkur og Grindavíkur í undanúrslitum Iceland Express deildar karla fer fram í Röstinni í Grindavík í kvöld. Leikurinn hefst kl. 20:00 og verður í beinni útsendingu hjá SÝN. Staðan í einvíginu er 2-1 Njarðvík í vil og takist þeim að landa sigri í kvöld eru þeir komnir inn í úrslitin. Ef Grindavík nær sigri þá jafna þeir metin í 2-2 og þá þarf oddaleik í Ljónagryfjunni.
Njarðvíkingar tóku 2-1 forystu á fimmtudag eftir mikinn spennusigur 89-87. Eftir tvo ójafna leiki mættust liðin loks í spennuleik. Í fyrsta leik voru Grindvíkingar teknir í kennslustund en snéru svo við blaðinu í öðrum leik liðanna. Síðasti leikur var því kannski það sem áhorfendur voru að bíða eftir, spenna, hraði og úrslitin réðust ekki fyrr í blálokin.
Einn af lyklunum að Njarðvíkursigri síðasta fimmtudag voru yfirburðir Íslandsmeistaranna í fráköstum. Njarðvíkingar tóku 41 frákast í leiknum gegn 27 frá Grindvíkingum. Gulir hafa þó verið að leysa ágætlega úr sínum málum í teignum og hafa yfirburðir Njarðvíkinga ekki verið jafn mikilir þar og margir héldu. Það sem varð Grindvíkingum að falli í síðasta leik var að aðeins sex leikmenn í liðinu voru að skora og fengu þeir ekki nema 4 stig í leikinn af varamannabekknum. Þá voru aðeins sjö leikmenn í Girndavíkurliðinu sem komu við sögu í leiknum og það er hverfandi möguleiki fyrir þjálfara að ætla sér í gegnum úrslitakeppni á sjö mönnum.
Njarðvíkingar léku á tíu mönnum gegn Grindavík á fimmtudag þar sem fimm leikmenn í liðinu gerðu 10 stig eða meira og þá kom Guðmundur Jónsson feikna sterkur inn af bekknum fyrir Íslandsmeistarana. Njarðvíkingar fengu 20 stig frá bekknum sínum á fimmtudag og hefur Einar verið að dreifa vel mínútunum á hvern leikmann.
Miðað við síðustu viðureignir liðanna má gera ráð fyrir eftirfarandi byrjunarliðum í kvöld.
Njarðvík
Jeb Ivey
Jóhann Árni Ólafsson? Guðmundur Jónsson?
Brenton Birmingham
Igor Beljanski
Friðrik Erlendur Stéfánsson
Grindavík
Adam Darboe
Þorleifur Ólafsson
Jonathan Griffin
Páll Axel Vilbergsson
Páll Kristinsson
Grindavík-Njarðvík
Leikur 4
Röstin í Grindavík í kvöld kl. 20:00
