12:50
{mosimage}
Þó íslensk ungmennalandslið taki ekki þátt í Evrópukeppnum þetta sumarið hafa íslenskir dómarar fengið verkefni frá FIBA. Sigmundur Már Herbertsson mun vera hlutlaus dómari í Evrópukeppni U20 ára landsliða karla, B deild sem fram fer í Varsjá í Póllandi 6.-15. júlí.
FIBA tilnefnir dómara frá hverri þjóð auk þess sem 8 hlutlausir dómarar dæma í mótinu en mótið er dæmt með þriggja manna kerfinu. Á lista yfir dómara sem verða þarna er að finna nokkur nöfn sem Íslendingar kannast við, t.d. Haydn Jones frá Wales, Oscar Lefwerth frá Svíþjóð, Karel Kraaijveld frá Hollandi, Carl Jungebrand frá Finnlandi og margir fleiri. FIBA leiðbeinandi verður svo hinn kunni Allan Richardson.
Sigmundur mun svo um mánaðarmótin ágúst september halda til Möltu ásamt Björgvini Rúnarssyni en þar munu þeir dæma í C deild U18 kvenna. Þar keppa Andorra, Gíbraltar, Lúxemborg, Malta og Mónakó.
Kristinn Óskarsson verður í Wales 16.-21. júlí að dæma í C deild U18 ára drengja með köppum eins og Skotanum Ed McKinley og Haydn Jones sem kemur beint frá Varsjá úr mótinu með Sigmundi.
Mynd: Gunnar Freyr Steinsson
