Haukur Helgi Pálsson og félagar í Assignia Manresa töpuðu í dag sínum öðrum leik í ACB deildinni á Spáni. Að þessu sinni var það á heimavelli gegn Grand Canary Herbalife. Lokatölur leiksins voru 64-80 Grand Canary í vil.
Haukur var í byrjunarliði Manresa í dag og lék í tæpar 13 mínútur en náði ekki að skora. Hann brenndi af eina teigskotinu sem hann tók í leiknum og tók auk þess 2 fráköst. Stigahæstur í tapliði Manresa var Charles Ramsdell með 14 stig.
Eftir tvær umferðir er Manresa í 14. sæti deildarinnar án stiga eins og reyndar stórlið Barcelona, Lagun Aro GBC, CB Canarias, Cajasol og Fuenlabrada.
