María Ben Erlingsdóttir og félagar í Texas Pan-American skólanum eru úr leik þetta tímabilið en í nótt lá liðið gegn Utah Valley í úrslitakeppni Great West riðilsins í bandarísku háskóladeildinni í körfuknattleik. María hefur þar með leikið sinn síðasta leik í bandarísku háskóladeildinni. Í nótt verður Haukur Helgi Pálsson svo á ferðinni með Maryland og annað kvöld leikur Helena Sverrisdóttir í undanúrslitum með TCU.
María var í byrjunarliðinu í nótt og lék í 33 mínútur og skoraði 13 stig í þessum síðasta leik sínum. Hún var einnig með 4 fráköst í leiknum, 1 stoðsendingu og 1 stolinn bolta.
Þá er úrslitastund hjá Hauki Helga Pálssyni og félögum í Maryland í kvöld þegar liðið mætir North Carolina State í úrslitakeppni ACC riðilsins, sigur þýðir áframhaldandi keppni og von um að komast inn í úrslitakeppni NCAA deildarinar, ósigur þýðir lok á tímabilinu.
Annað kvöld verða Helena Sverrisdóttir og TCU á ferðinni í undanúrslitum Mountain West riðilsins þegar þær mæta New Mexico. Í hinum leiknum mætast topplið BYU og Utah.
Mynd/ María Ben hefur leikið sinn síðasta háskólaleik með UTPA
