Miðherjinn Sigurður Þórarinsson er ökklabrotinn og leikur ekki meira með Skallagrím í 1. deild karla þetta tímabilið. Sigurður var að leika með unglingaflokki á dögunum þegar hann rann til í Seljaskóla með þeim afleiðingum að hann ökklabrotnaði. Pálmi Þór Sævarsson þjálfari Skallagríms staðfesti þessi tíðindi við Karfan.is.
Pálmi sagði einnig að Skallarnir gætu þurft að líta í kringum sig í s.b.v. liðsauka þar sem Hörður Helgi Hreiðarsson er einnig enn meiddur og Skallarnir hafi því orðið fyrir talsverðri blóðtöku í kringum körfuna. Loku er því ekki fyrir það skotið að Borgnesingar bæti við sig erlendum leikmanni til að fylla skarð Sigurðar og Harðar.
Mynd/ Úr safni: Sigurður Þórarinsson í leik með sameiginlegu liði Snæfells og Skallagríms í bikarkeppni yngri flokka.
