Lakers kvöddu Buss með sigri á Boston

Stórveldin Lakers og Boston mættust í Staples Center í nótt þar sem Lakers heiðruðu minningu gamla eiganda síns, Jerry Buss, sem lést nýverið með góðum 113-99 sigri í þessu gamalgróna einvígi risanna.

 

Sjö liðsmenn Lakers gerðu 10 stig eða meira í leiknum, stigahæstur var Dwight Howard með 24 stig og 12 fráköst og Kobe Bryant bætti við 16 stigum og 7 stoðsendingum. Hjá Boston var Paul Pierce með 26 stig, 4 fráköst og 5 stoðsendingar.

 

Steve Nash gerði 14 stig í leiknum og gaf 7 stoðsendingar og skráði sig um leið ofar í sögubækur stoðsendinganna en hann hefur nú gefið samtals 10.144 stoðsendingar í NBA deildinni. Nash komst því upp í 4. sæti listans yfir flestar stoðsendingar í sögu NBA og fór í nótt fram úr einni af skærustu stjörnu Lakers allra tíma, Magic Johnson.