Leikir dagsins: Sautjánda umferð hefst hjá körlunum

Í kvöld hefst sautjánda umferðin í Domino´s deild karla en þá eru fjórir leikir á dagskrá og venju samkvæmt allir kl. 19:15. Nýkrýndir bikarmeistarar Stjörnunnar mæta í Hertz Hellinn og leika þar gegn ÍR sem situr á botni deildarinnar.

 

ÍR – Stjarnan

Njarðvík – KR

Snæfell – Fjölnir

Grindavík – Skallagrímur (beint á Sport TV)

 

ÍR situr á botni deildarinnar með 8 stig en Stjarnan í 6. sæti með 18 stig. Það þarf vart að tíunda hvað tvö stig þýða fyrir ÍR hér í kvöld og kannski ekki síður Stjörnuna sem berst hart fyrir heimaleikjarétti í úrslitakeppninni svo hér gæti orðið ansi forvitnilegur slagur. ÍR og Stjarnan hafa sex sinnum mæst í deildarkeppni úrvalsdeildar í Breiðholti, ÍR hefur aðeins unnið tvo af þessum leikjum en Stjarnan fjóra.

 

Njarðvíkingar eru komnir vel á veg með sætið sitt í úrslitakeppninni en það er skammt á milli feigs og ófeigs þessa dagana. Að sama skapi er KR í svipuðum málum og Stjarnan, að berjast á fullu fyrir heimaleikjarétt í úrslitakeppninni. Rimmur þessara tveggja klúbba ná langt aftur í fornöld eða til ársins 1970 þar sem KR vann í Ljónagryfjunni 42-71. KR hefur unnið tvo síðustu deildarleiki í Ljónagryfjunni og samtals þrjá síðustu leiki gegn Njarðvík ef með er talin úrslitakeppnin.

 

Hólmarar eru í bullandi toppbaráttu þessi dægrin og sitja í 2. sæti deildarinnar með 24 stig en Fjölnir líkt og ÍR er á botni deildarinnar með 8 stig. Fjölnir hefur aðeins einu sinni unnið sigur í deildarleik í Hólminum og var það skömmu fyrir jól 2007.

 

Topplið Grindavíkur mætir aftur til leiks eftir að hafa þegið silfurverðlaun út úr Laugardalshöll. Skallagrímsmenn koma þá í heimsókn en Borgnesingar töpuðu með 50 stiga mun síðast þegar þeir mættu í röstina í ársbyrjun 2009. Skallagrímsmenn hafa þó gert góða ferð til Grindavíkur í deildarkeppni og síðast unnu þeir í Röstinni í ársbryjun 2007.