Tveir stórleikir fara fram í Stykkishólmi og í Hveragerði í kvöld. Báðir vitaskuld á hinum herrans tíma 19:15. Í Stykkishólmi mætast Snæfell og KR í þriðju undanúrslitaviðureign Domino´s deildar kvenna en staðan í einvíginu er jöfn, 1-1. Þá mætast Hamar og Stjarnan í 1. deild í oddaleik um laust sæti í Domino´s deild kvenna á næstu leiktíð en leikið er í Hveragerði.
Staðan í einvígi Snæfells og KR er 1-1 en liðin hafa unnið sinnhvorn útileikinn til þessa. Vinna þarf þrjá leiki til að komast í úrslit en í hinni rimmunni eigast við Keflavík og Valur þar sem Valskonur tóku 1-2 forystu í gærkvöldi.
Hjá Hamri og Stjörnunni í 1. deild kvenna er staðan líka 1-1 og oddaleikurinn fer fram í kvöld. Það lið sem vinnur mun leika í Domino´s deild kvenna á næstu leiktíð. Það ætti enginn að missa af þessum slag í kvöld og einkum og sér í lagi þar sem Arionbanki mun bjóða frítt inn á leikinn!
Unglingaflokkar karla og kvenna verða einnig á ferðinni í kvöld sem og B liða keppni karla en yfirlit yfir alla leiki dagsins má nálgast hér.
Mynd/ Sumarliði Ásgeirsson – Frá annarri viðureign KR og Snæfells í undanúrslitum Domino´s deildar kvenna í DHL Höllinni.
