Nowitzki í 25.000 stiga klúbbinn

Átta leikir fóru fram í NBA deildinni í gær og í nótt. Dirk Nowitzki komst í eftirsóttan klúbb þegar hann rauf 25.000 stiga múrinn í öruggum 89-107 útisigri Dallas gegn New Orleans Hornets.

 

Shawn Marion var stigahæstur hjá Dallas í leiknum með 21 stig en Nowitzki gerði 19 og tók 6 fráköst. Hjá Hornets var Ryan Anderson stigahæstur með 20 stig og 10 fráköst.

 

Þá tókst LA Lakers að leggja San Antonio Spurs í Staples Center og það án Kobe Bryant sem eins og frægt er orðið hefur slitið hásin og verður ekki meira með á þessu tímabili. Lokatölur í viðureign Lakers og Spurs voru 91-85 Lakers í vil.

 

Dwight Howard var með myndarlega tvennu í leiknum, 26 stig og 17 fráköst en Tim Duncan var með 23 stig og 10 fráköst í liði Spurs.