Proctor opnaði einkasýningu í Iðu

Antoine Proctor hélt sína fyrstu einkasýningu í Iðu á Selfossi í kvöld, þegar Tindastóll sigraði FSu í 1. deild karla 89-100. Verkin á sýningunni voru afar fjölbreytt og litadýrðin einstök, allt frá klassískum síðrómantískum stíl yfir í módernískar strokur. Inn á milli mátti líka sjá póstmódernísk áhrif en áhrifaríkust á sýningunni voru verk í anda töfraraunsæis. Í alvöru talað; gaurinn var með 47 stig, 10 fráköst, 5 stoðsendingar og 3 stolna bolta – 51 í framlag og heimamenn réðu ekkert við hann. Undirrituðum er til efs að nokkurn tíma hafi erlendur leikmaður í þessum gæðaflokki spilað í næst efstu deild á Íslandi.

 

 

En að leiknum. Darrel Flake byrjaði á því að setja fyrstu 6 stigin á sinn gamalkunna hátt og læddist strax að grunur um að ungu kjúklingarnir í FSu-liðinu yrðu þægileg bráð fyrir gamla refinn. Hann sallaði niður 19 stigum í rólegheitum, og í rauninni ekki þörf fyrir mikið framlag frá innfæddum Skagfirðingum til að vinna leikinn. FSu-liðið komst þó í gang og tók forystuna eftir 4 mínútur, 11-8, 20-15 eftir 8 mín. og leiddi 25-23 eftir fyrsta leikhluta.

 

Tindastóll jafnaði strax í upphafi 2. leikhluta og komst 3 stigum yfir, en um miðjan leikhlutann var staðan 34-34 og jafnt var á næstu tölum. En svo náði FSu góðri rispu og tók frumkvæðið, 47-41 eftir 19 mínútur og 50-46 þegar fyrri hálfleikur var að renna út. Í lokasókn hálfleiksins brutu FSu-strákar smávægilega á Proctor í þriggjastigaskoti um það bil klukkan gall, og til að strá salti í sárið var dæmd á þá tæknivilla fyrir, að því er virtist ofan úr stúku, kurteisleg mótmæli. Proctor skoraði úr 5 vítum og kom gestunum yfir, 50-51.

 

Í seinni hálfleik skildi leiðir og Tindastóll náði mest 19 stiga forystu. FSu-menn voru andlausir og Tindastóll virtist hirða alla lausa bolta, öll fráköst og skora að vild. Staðan eftir 30 mínútur var 66-84. Tindastóll sigldi svo til hafnar nokkuð örugglega, enda með leikmann í sínum röðum sem getur haldið boltanum og skorað nánast þegar honum dettur í hug. FSu sýndi þó gleðilegan karakter síðustu mínúturnar, strákarnir náðu aftur upp baráttunni og minnkuðu muninn jafnt og þétt, næst komust þeir í 9 stiga mun, 89-98, þegar um ein mínúta var til leiksloka, en Tindastóll skoraði síðustu stigin og vann verðskuldaðan 11 stiga sigur, 89-100.

 

Leikurinn var hin besta skemmtun, mikil barátta og harka á báða bóga og menn lögðu allt í leikinn. Skagfirðingar geta fyrst og fremst þakkað sínum erlenda leikmanni fyrir sigurinn. Án afburða frammistöðu Proctors hefði liðið tæplega unnið, þrátt fyrir góðan leik Darrell Flake. Það eina sem á skyggði var óþarfa taugaveiklun dómaranna, sem voru sínkt og heilagt flautandi tæknivillur á báða bóga. Það var alveg óþarfi, því enginn var með óhóflegan æsing, þó vissulega hlypi mönnum í báðum liðum kapp í kinn öðru hvoru: þetta var alvöru viðureign á úrvalsdeildarplani og enginn til með að leggjast bara niður og dilla rófunni!

 

Hjá Tindastóli hefur verið getið þáttar atvinnumannanna Proctors og Flake, en aðrir sem komust á blað voru Helgi Freyr með 12 stig, Pétur Rúnar 11, Ingvi Rafn 6, Friðrik Þór 3 og Helgi Rafn Viggósson 2 stig.

 

Til að geta unnið Tindastól vantar FSu betri liðsvörn. Það var ekki á færi eins manns að stöðva Proctor. Einnig vantar nokkuð upp á betri ákvarðanatöku í sókninni á köflum. Því bregður við að verið sé að reyna alltof erfiða hluti þegar fríar stórskyttur standa jafnvel galopnar á næsta leiti. Ari Gylfason var stigahæstur með 29 stig og ágætan leik, yfir 40% skotnýtingu. Collin Pryor skoraði 19 stig en reif niður 20 fráköst. Hann spilaði frábæra vörn, hélt Helga Rafni alveg niðri og lét leikstjórnandann Proctor finna til tevatnsins síðustu mínútur leiksins. Frábær varnarmaður Collin. Daði Berg skoraði 14 stig, Svavar Ingi 13 stig og nýtti færin vel – hefði mátt fá úr meiru að moða undir körfunni. Framfarir þar hjá honum. Hlynur Hreinsson stjórnaði leik FSu mjög vel lengst af, skoraði 8 stig og tók 6 fráköst! Erlendur Ágúst skoraði 5 stig og gerði vel, Arnþór Tryggvason 1 stig og lét að venju til sín taka á þeim mínútum sem hann fékk.

 

Segja má að Erik Olson, þjálfari FSu, hefði mátt nýta bekkinn betur. Nánast allt byrjunarliðið spilaði yfir 30 mínútur, Ari og Collin báðir rúmar 38 mínútur. Svona barátta tekur sinn toll og í alvöru leikjum þurfa bestu leikmennirnir að vera ferskir allan tímann. Bárður Eyþórsson nýtti sinn mannskap mun betur, líka unga og lítt reynda stráka.

 

Þakkir til beggja liða fyrir skemmtunina.