Sundsvall Dragons unnu í gærkvöldi spennuleik gegn Uppsala Basket í sænsku úrvalsdeildinni, lokatölur 78-76 á heimavelli Drekanna. Landsliðsmennirnir Hlynur, Jakob og Ægir gerðu 42 af 78 stigum Sundsvall í leiknum.
Það var Hlynur Bæringsson sem gerði sigurstigin af vítalínunni þegar 13 sekúndur lifðu leiks en þá kom hann Sundsvall í 78-74 og Uppsala-menn áttu ekki afturkvæmt eftir það.
Hlynur lauk leik með 19 stig, 9 fráköst og 4 stoðsendingar, Jakob Örn Sigurðarson bætti við 18 stigum og 7 stoðsendingum og þá var Ægir Þór Steinarsson með 5 stig, 7 stoðsendingar og 6 fráköst.
Sundsvall er sem fyrr í 4. sæti deildarinnar og nú með 5 sigra og 3 tapleiki en Boras sitja á toppnum og hafa unnið alla átta leiki sína til þessa.
Jakob Örn Sigurðarson er áttundi stigahæsti leikmaður sænsku úrvalsdeildarinnar um þessar mundir með 19,63 stig að meðaltali í leik. Hlynur vermir 17. sæti með 16,13 stig og er í 2. sæti yfir frákastahæstu leikmenn deildarinnar með 9,38 fráköst að meðaltali í leik. Jakob Örn vermir svo 9. sætið yfir flestar stoðsendingar með 4,25 í leik og Ægir Þór er í 12. sæti með 4,0 stoðsendingar að meðaltali í leik. Í framlaginu er Hlynur í 2. sæti deildarinnar með 24,13 framlagsstig í leik, Jakob í 21. sæti með 16,0 og Ægir Þór í 37. sæti með 11,38.
