Ari setti met í fyrstu og úrvalsdeild

Bakvörðurinn Ari Gylfason setti met þetta tímabilið í karlaboltanum í fyrstu og úrvalsdeild þegar hann sallaði niður níu þriggja stiga körfum í sigri FSu gegn KFÍ í 1. deild karla.

 

Fyrir var Austin Magnus Bracey með 8 þrista í Domino´s deild karla í viðureign Stjörnunnar og Snæfells og Zachary Warren setti einnig 8 fyrir ÍA í leik gegn Hamri á útivelli. Ari skákaði bæði Warren og Bracey í gærkvöldi með níu þristum!

 

Ari setti niður níu af 17 þriggja stiga skotum sínum í leiknum og var með 53% þriggja stiga nýtingu, rétt aðeins lakari nýting en Fjölnir var með í vítaskotunum sínum í gærkvöldi gegn Skallagrím!