Haukar og Grindavík eru á ferðinni í kvöld, við pikkuðum í einn sem komið hefur við á báðum stöðum en það er enginn annar en leikjahæsti leikmaður úrvalsdeildar frá upphafi, Marel Örn Guðlaugsson. Marel ól manninn framan af með Grindavík en lokaði ferlinum með Haukum en bæði lið eru að spila í 8-liða úrslitum Domino´s-deildar í kvöld. Haukar með 1-0 forystu á Keflavík og Grindavík 1-0 undir gegn Tindastól.
Keflavík – Haukar
Á von á hörkuleik í Keflavík í kvöld, Keflvíkingar særðir eftir fyrsta leikinn. Í fyrsta leiknum vantaði framlag frá lykilmönnum Keflavíkur, þeir mega alls ekki við því. Haukar eru hins vegar einfaldlega númeri of stórir fyrir Keflavík í ár og taka leikinn með 5-10 stigum. Varnarleikurinn verður í fyrirrúmi, líkt og í fyrri leiknum og stigaskorið því lágt. Breiddin er meiri í Haukaliðinu og þeir geta leyft sér að setja lykilleikmenn á bekkinn öðru hvoru til að hlaða batteríin.
Grindavík – Tindastóll
Það getur allt gerst í þessum leik, líkt og við sáum í fyrsta leiknum fyrir norðan. Mínir gömlu félagar í Grindavík eru komnir með bakið upp við vegg og vilja alls ekki fara norður í stöðunni 2-0. Hef trú á að Ingvi Þór stígi upp í kvöld og skili því sem þarf til að skila sigri í hús fyrir Grindvíkinga, stórleikur hjá frænda. Grindvíkingar klára þetta í lokin eftir spennuleik, með 5 stigum.
Mynd/ Marel lengst til hægri. Það vantar s.s. ekki sleggjurnar á þessa mynd því fyrir miðju er faðir körfubolti í Hafnarfirði, Ingvar Jónsson, og í forgrunni er Steinar Hafberg einn lífsseigasti neðrideildaspilari landsins.
