KR hefur samið við tvær efnilegar körfuknattleikskonur, þær Rakel Þorvaldsdóttur og Rakel Maríu Pálmadóttur, sem báðar skrifuðu nýverið undir sína fyrstu samninga við deildina.
Rakel Þorvaldsdóttir er uppalin í Vesturbænum og hefur leikið með félaginu upp alla yngri flokka. Hún þreytti frumraun sína í úrvalsdeildinni á dögunum þegar KR lagði Val að velli, auk þess sem hún mun leika með venslaliði KV í 1. deild kvenna í vetur. Þá lék hún með U15 ára landsliði Íslands síðastliðið sumar við góðan orðstír.
Rakel María er uppalin hjá Skallagrími og lék upp alla yngri flokka í Borgarnesi. Hún mun leika á venslasamningi með Skallagrími í 1. deildinni samhliða því að spila með yngri flokkum KR.
