Alls leika 132 leikmenn með reynslu úr NBA-deildinni í EuroLeague á leiktíðinni 2026–27. Samkvæmt úttekt körfuboltamiðilsins BasketNews námu heildartekjur þessara leikmanna á NBA-ferlinum um 1,59 milljörðum Bandaríkjadala, eða rúmum 215 milljörðum íslenskra króna.
Af þessum 132 leikmönnum þénuðu 102 að minnsta kosti eina milljón dala á ferli sínum í deildinni og 27 þeirra náðu 10 milljóna dala markinu. Tölurnar byggja á gögnum frá Spotrac og HoopsHype og miðast við heildarlaun fyrir skatta.
Valanciunas efstur á listanum
Litháíski miðherjinn Jonas Valanciunas trónir á toppi listans eftir að hafa snúið aftur til Evrópu og samið við Zalgiris Kaunas. Valanciunas lék í 14 tímabil í NBA-deildinni og spilaði 1.002 deildarleiki með Toronto, Memphis, New Orleans, Washington, Sacramento og Denver. Á þeim tíma þénaði hann um 157,1 milljón dala (um 21,5 milljarða króna).
Franski bakvörðurinn Evan Fournier vermir annað sætið með 145,4 milljónir dala eftir 12 ára farsælan feril í NBA, þar sem hann lék lengst af með Orlando Magic og New York Knicks.
Topp 10 tekjuhæstu NBA-leikmennirnir í EuroLeague og tekjur þeirra úr NBA deildinni:
- Jonas Valanciunas – $157,1 milljón
- Evan Fournier – $145,4 milljónir
- Patty Mills – $85,6 milljónir
- Davis Bertans – $84,7 milljónir
- Cory Joseph – $78,9 milljónir
- Jae Crowder – $71,9 milljónir
- T.J. Warren – $60,3 milljónir
- Kenneth Faried – $56,9 milljónir
- Jabari Parker – $56,4 milljónir
- Dario Saric – $51,1 milljón
Meðal annarra þekktra nafna á listanum má nefna tékkneska leikstjórnandann Tomas Satoransky ($44,9 milljónir), Nikola Mirotic ($41,6 milljónir) og þýska miðherjann Daniel Theis ($40,8 milljónir).
