Ísland mætir Finnlandi í síðasta leik A-riðils í dag. Leikurinn er ekki uppá neitt nema stoltið en hvorugt liðið getur hreyfst til í töflunni eftir úrslit dagsins. Ísland mun enda í neðsta sæti riðilsins og þar sem Slóvenía vann Frakkland þá er ljóst að Finnland endar í öðru sæti riðilsins.
Samkvæmt forsvarsmönnum KKÍ er uppselt á Hartwall Arena í Helsinki í kvöld á leik Íslands og Finnlands. Stuðningsmenn beggja liða hafa slegið heldur betur í gegn á mótinu en fullt hefur verið á alla leiki Finnlands á mótinu.
Hartwall Arena tekur 12.500 manns í sæti og því ljóst að stemmningin verður rosaleg. Leikurinn hefst kl 17:45 að íslenskum tíma og er í beinni útsendingu á RÚV.
