Helena Sverrisdóttir vann sinn þriðja leik í röð í gær með TCU háskólanum þegar Wyoming kom í heimsókn í bandarísku háskóladeildinni í kvennakörfuknattleik. Lokatölur leiksins voru 65-54 TCU í vil þar sem Helena setti nýtt met.
Helena skoraði 11 stig í leiknum á 31 mínútu og var einnig með 6 stoðsendingar, 2 fráköst og 1 stolinn bolta. Stigahæst hjá TCU voru Starr Crawford og Emily Carter báðar með 16 stig.
Í gær afrekaði Helena það að vera í byrjunarliði TCU í 119. sinn og setti þar með nýtt met hjá kvennaliði TCU en gamla metið var 118 skipti í röð í byrjunarliðinu og það átti Sandora Irvin tímabilin 2001-2005.
Með sigrinum er TCU komið upp í 2. sæti í Mountain West riðlinum með 9 sigra og 2 tapleiki en BYU skólinn er á toppi riðilsins, 10-1.
