Öllum leikjum er nú lokið í A-riðli Eurobasket fyrir utan Ísland-Finnland. Mikil spenna var í fyrstu tveimur leikjum dagsins og réðst staðan í riðlinum á þeim.
Slóvenía fór taplaust í gegnum riðilinn eftir sannfærandi sigur á Frakklandi í fyrsta leik dagsins. Goran Dragic heldur áfram að eiga frábært mót en hann smellti í 22 stig og 8 stoðsendingar í leiknum til að tryggja 95-78 sigur á Frakklandi.
Leikritið í kringum lið Grikklands fékk smá pásu í dag er liðið náði að tryggja sig áfram í 16 liða úrslitin. Til þess vann liðið sigur á Póllandi í lokaleik liðanna í riðlinum. Leikurinn var algjör úrslitaleikur um hvort liðið kæmist áfram og stóð hann undir væntingum. Grikkland seig aðeins frammúr í fjórða leikhluta en framan af því höfðu liðin verið jöfn á nánast öllum tölum. Grikkland hafði að lokum sigur 95-77.
Það þýðir að leikur Íslands og Finnlands hefur nákvæmlega enga þýðingu um lokastöðu riðilsins. Finnland mun enda í öðru sæti riðilsins og Ísland í því neðsta. Það gefur Íslandi vonandi vonir um að heimamenn mæti værukærir til leiks.
