Skallagrímur í úrslitakeppni þrátt fyrir tap í framlengingu

Lokaumferð Dominos deildar kvenna fór fram í dag með fjórum leikjum. Nokkur spenna var fyrir umferðina og kom í ljós hvaða lið verða í úrslitakeppninni. 

Í Hafnarfirði var framlengt og unnu Haukar sigur á Skallagrím. Það skipti engu máli fyrir Borgnesinga þar sem Stjarnan tapaði fyrir Val sem þýðir að Skallagrímur stal fjórða sætinu af Stjörnunni með mögnuðum lokaspretti í deildinni þar sem liðið vann sex af síðustu sjö leikjum sínum fyrir daginn í dag. 

Keflavík vann nágranna sína í Njarðvík og náði þar með að tryggja annað sæti deildarinnar og heimaleikjarétt. Njarðvík aftur á móti kvaddi efstu deild í bili með tapi í dag. Þá var hreinn úrslitaleikur um 6. sæti deildarinnar í Stykkishólmi þar sem Snæfell vann Breiðablik í spennandi leik. 

Í 1. deild kvenna tryggði KR sér sæti í úrslitaeinvíginu með sigri á Grindavík en einvígið fór 3-0 fyrir KR. Það er þá ljóst að KR og Fjölnir leika til úrslita um sæti í Dominos deild kvenna. 

Úrslit dagsins: 

Dominos deild kvenna:

Haukar 87-82 Skallagrímur 
Njarðvík 69-80 Keflavík
Snæfell 71-68 Breiðablik
Stjarnan 66-85 Valur