UMFN sigraði Tindastól í 8 liða úrslitum Bikarkeppni KKÍ í gærkvöld í Akurskóla í Njarðvík. Lokatölur urðu 83-47 en heimamenn leiddu allan leikinn. www.umfn.is greinir frá.
Njarðvíkingar komust í 9-2 snemma leiks og Hilmir Karl Hjörvarsson kom sterkur af bekknum og gerði 5 stig á stuttum tíma og Njarðvík leiddi 20-10 eftir fyrsta leikhluta. Hilmir Karl opnaði annan leikhluta með sínum öðrum þrist en gestirnir skelltu þá tveimur þristum á stuttum tíma og staðan orðin 23-20. Þá kom 11-0 kafli hjá Njarðvíkingum þar sem Brynjar Þór Guðnason og Maciej Baginski voru í aðalhlutverkum. Staðan í hálfleik var svo 38-26.
Heimamenn tóku svo alla spennu úr leiknum með öflugum leik í upphafi síðari hálfleiks. Maciej var gestunum erfiður og gerði 8 stig á fyrstu fjórum mínútum hálfleiksins en var svo tekinn af velli og lék ekki meira með, en munurinn var kominn í 25 stig þegar þriðja leikhluta lauk (62-37).
Í lokaleikhlutanum voru það svo Kristinn Pálsson og Brynjar Guðnason sem voru atkvæðamiklir og þrátt fyrir góða baráttu Tindastólsmanna þá unnu Njarðvíkingar öruggan sigur og þeir eru komnir í 4 liða úrslit bikarkeppninnar í ár.
Maciej Baginski var atkvæðamestur Njarðvíkinga en hann gerði 23 stig á 23 mínútum. Brynjar Þór Guðnason gerði 20 stig, Kristinn Pálsson 12, Hilmir Karl Hjörvarsson 10, Tómas Orri Grétarsson 9, Atli Freyr Kristjánsson 4, Magnús Már Traustason 3 og Friðrik Árnason 2.
Stigahæstir hjá Tindastól voru Pétur Birgisson 13, Sigurður Stefánsson 9, Arnar G Hjartarson 8.
Leikinn dæmdu þeir Jón Guðmundsson og Ísak Ernir Kristinsson og dæmdu þeir vel.
Mynd/ Úr safni: Maciej Baginski í leik með U16 ára landsliði Íslands
