Í aðdraganda oddaleiks Vals og Keflavíkur í kvöld má sjá að tölfræðin á milli liðanna er hnífjöfn í mörgum lykilþáttum í einvíginu sem bendir til þess að mögulega megi lítið útaf bera fyrir liðin í kvöld.
Í ljósi gagna úr úrslitakeppninni má sjá að einvígið er gífurlega jafnt og tölfræðin endurspeglar þá hörku sem einkennt hefur síðustu fjóra leiki. Valur og Keflavík hafa bæði unnið tvo leiki og hafa skorað nánast jafn mikið, en Valur er með 80,5 stig að meðaltali gegn 81,5 stigum Keflavíkur í þessum fjórum leikjum. Baráttan um fráköstin er einnig gríðarlega jöfn þar sem Keflavík hefur tekið 44,5 fráköst að meðaltali á móti 42,7 hjá Val.
Sóknarleikur Vals í einvíginu hefur mikið hvílt á herðum Keyshawn Woods sem leiðir liðið með yfir 23 stig og 23 í framlag að meðaltali í einvíginu. Þrátt fyrir þessa miklu framleiðni hefur liðið átt í verulegum erfiðleikum fyrir utan þriggja stiga línuna eins og sést á því að einn besti skotmaður landsins Kári Jónsson er aðeins með rúmlega 21 prósent nýtingu og Frank Aron Booker tæp 31 prósent. Kristófer Acox hefur hins vegar verið gríðarlega mikilvægur undir körfunni fyrir Val með yfir 11 fráköst og 20 í framlag að meðaltali sem hjálpar til við að vega upp á móti slakri nýtingu skotmanna liðsins.
Hjá Keflavík er það Mirza Bulic sem hefur verið mikilvægastur í einvíginu með tæp 20 stig og 11 fráköst að meðaltali sem gerir hann að þeirra helstu ógn. Remy Martin fylgir fast á eftir með 18 stig og þarf liðið á meiri stöðugleika frá mönnum eins og Egor Koulechov og Craig Edward Moller að halda til að landa sigri á útivelli í kvöld. Keflvíkingar hafa sýnt að þeir geta unnið jafna leiki eins og sást í öðrum leik einvígisins og munu þeir treysta á að Mirza og Remy nái að stýra sókninni gegn vörn Vals sem mun vafalaust reyna að þrýsta á þá frá fyrstu mínútu.
Hérna eru viðureignir liðanna í úrslitakepninni
