Lykilleikmaður fyrsta leiks úrslitaeinvígis Keflavíkur og Snæfells var leikmaður Keflavíkur, Ariana Moorer. Á tæpum 39 mínútum spiluðum í sigri liðsins skilaði Ariana þrefaldri tvennu. Skoraði 20 stig, tók 15 fráköst, gaf 10 stoðsendingar og stal 6 boltum. Einnig reyndist hún þeim gífurlega mikilvæg undir lok leiksins, þar sem hún meðal annars ísaði leikinn fyrir Keflavík með laglegu þriggja stiga skoti þegar að um 10 sekúndur voru eftir.