Það var engu líkara en úrslitakeppnin væri hafin miðað við umgjörðina og rafmagnaða stemninguna í Kaldalónshöllinni í kvöld þegar Álftanes tók á móti KR í stórleik 5. umferðar Bónus deildar karla.
Bæði lið voru taplaus fyrir leikinn ásamt Val, en það voru KR-ingar sem fögnuðu dýrmætum 102–94 sigri og tróna nú einir á toppi deildarinnar með tíu stig eftir fimm leiki.
KR mætti gríðarlega vel undirbúið og spilaði öfluga vörn strax í upphafi sem gerði heimamönnum erfitt fyrir. Vesturbæingar leiddu 28–20 eftir fyrsta leikhluta og héldu frumkvæðinu inn í hálfleikinn í stöðunni 51–41, þar sem þeir sóttu stíft inn í teiginn og skoruðu þar heil 34 stig fyrir hlé.
Álftanes svaraði af krafti í þriðja leikhluta. Sigurður Pétursson kveikti neistann með þristi og fiskaði ruðning áður en hann tróð boltanum, og heimamenn fylgdu því eftir með 6–0 áhlaupi til að ná yfirhöndinni fyrir lokaleikhlutann, 74–73. Fjórði leikhluti var í járnum allt fram á lokamínúturnar, en þegar Jordan Semple fékk dæmda á sig óíþróttamannslega villu nýtti KR sér tækifærið, komst í 96–86 og sigldi sigrinum faglega í höfn.
Þórir Guðmundur Þorbjarnarson var maður leiksins hjá KR með glæsilega tvennu, 15 stig og 10 stoðsendingar, en Linards Jaunzems var stigahæstur með 26 stig og 9 fráköst. Rafail Lanaras bætti við 15 stigum og Þorvaldur Orri Árnason skilaði 14 stigum. Hjá Álftanesi bar Jordan Semple höfuð og herðar yfir aðra með 26 stig, 7 fráköst, 5 stoðsendingar, 3 varin skot og 37 framlagsstig, á meðan Martins Laksa skilaði 13 stigum og Dedrick Deon Basile skoraði 11 stig ásamt 10 stoðsendingum.
