Írland vann öruggan 18 stiga útisigur gegn Aserbaídsjan, 73-91, í A-riðli undankeppni EM kvenna í dag. Leikurinn fór fram í Bakú og voru Írar með yfirhöndina allan tímann.
Írska liðið vann alla fjóra leikhlutana (20-24, 20-22, 15-18 og 18-27) og innbyrti þar með sinn fyrsta sigur í riðlinum eftir að hafa tapað fyrir Íslandi fyrr í vikunni.
Írland er því með einn sigur og eitt tap eftir fyrstu tvær umferðirnar, en Aserbaídsjan tapaði einnig sínum fyrsta leik gegn Sviss. Ísland og Sviss mætast í hinum leik annarrar umferðar í kvöld og með sigri verður íslenska liðið eitt á toppi riðilsins og það eina sem er enn taplaust.
