Haustbragur í jöfnum leik

Það var í verkahring Borgnesinga að sýna Ísfirðingum í kvöld hvar Davíð keypti ölið þegar þeir fóru með sigur af hólmi í 2.umferð Lengjubikarsins 86-81. Talsverður haustbragur var á leik beggja liða og einnig mátti merkja eilítinn haustbrag á dómurum leiksins sem oft máttu muna fífil sinn fegurri. Mesti haustbragurinn var þó á nettengingunni í húsinu, sem virkaði ekki eins og ætlast er til. Af þeim sökum er enga tölfræði að hafa úr leiknum.

 

Bæði lið byrjuðu leikinn af miklum krafti og var mikið skorað í upphafi leiks. Gestirnir reyndu að nýta sér smæð heimamanna og skoruðu grimmt undir körfunni á meðan Skallar treystu mest á hraðan leik og langskot. Nafnarnir Davíð Ásgeirsson og Guðmundsson voru þrælsprækir í liði heimamanna. Guðmundsson setti niður 5 þrista og 3 víti í leiknum alls 18 stig á meðan Ásgeirsson setti 13. Jafnræði var með liðunum allt fram í 4.leikluta er Borgnesingar náðu 8 stiga forskoti. Gestirnir náðu þó að komast yfir á nýjan leik. Heimamenn voru þó sterkari í lokin og lönduðu sanngjörnum sigri í hörkuleik.

Davíð Guðmunds 18

Egill Egils 16

Davíð Ásgeirs 13

Valur S. 11

Sigurður Þórarins 11

Trausti Eiríks 10

Orri Jóns 4

Kristján Ómars 3

 

Jason Smith 26

Mirko 15

Ágúst 11

Hraunar 7

Pavle 6

Óskar 5

Guðmundur 3

Jón Hrafn 3

Leó 2

Björgvin 2