Skagfirðingar lögðu Jonava að velli ytra, 77–71, og halda því áfram fullkomnu gengi sínu í riðlakeppni ENBL með tvo sigra í tveimur leikjum.
Litáíska liðið var skrefinu á undan í leikhléi, 37–36, en úrslitin réðust á ögurstundu undir lok leiks. Þegar Tindastóll lenti tveimur stigum undir, 65–63, svöruðu lærisveinar Arnars Guðjónssonar með ótrúlegum 9–0 kafla sem gerði út um leikinn.
Sigtryggur Arnar fór fyrir sóknarleik Stólanna með 16 stig, þeir Júlíus Orri og Adomas Drungilas lögðu til 12 stig hvor, og leikstjórnandinn Dee Bost stjórnaði spilinu af yfirvegun með 9 stig, 7 fráköst og 7 stoðsendingar. Liðið heldur nú beint til Englands þar sem leikið verður gegn Bristol Flyers á miðvikudaginn.
