Mikil körfuboltagleði hefur einkennt Akureyri um helgina. Pollamóti Þórs lauk í gær og er bundið enda á helgina með tvíhöfða. Þór Akureyri tók á móti Þór Þorlákshöfn í 1. deild kvenna í dag. Miklar breytingar hafa orðið á liðunum í sumar og var leikurinn fyrsti keppnisleikur beggja liða á þessu tímabili.
Þór Þorlákshöfn sótti erfiðan sigur á Akureyri í hnífjöfnum leik, en lokatölur eru 80-82. Hjá gestunum leiddi Shawnteanna Tillman í stigum með 24 slík, og var Antoaneta Alexe skammt undan með 23 stig. Emma Karólína var stigahæst fyrir heimamenn með 27 stig og var Nile Miller með 22 stig.
Akureyringar fóru betur af stað í fyrsta leikhluta og byrjuðu með 11-2 kafla þar sem hratt spil og ákefð í vörn réðu ríkjum. Þór Þorlákshöfn náði að hægja á leiknum og Shawnteanna Tillman skoraði mikilvæga þriggja stiga körfu undir lok leikhlutans til að minnka muninn í 23-20.
Gestirnir komu með krafti inn í 2. leikhluta með hárri boltapressu og komust yfir, en Nile Miller fór á kostum fyrir heimamenn og var staðan 39-41 í hálfleik, gestunum í vil.
Seinni hálfleikur hófst með góðum 12-3 spretti Þórs Þorlákshafnar en heimakonur bitu jafnt og þétt á muninn í gegnum þriðja leikhluta og endaði hann 58-60. Það sem eftir var af leiknum var algjör spennutryllir og liðin hnífjöfn. Gestirnir tóku boltann inn í stöðunni 80-80 með um 7 sekúndur eftir. Þá var dæmd villa á heimamenn, við litla hrifningu Akureyringa. Shawnteanna Tillman fór á vítalínuna og setti tvö skot niður og 80-82 sigur gestanna staðreynd.
Umfjöllun / Birkir H
