Í nýjasta þætti Aukasendingarinnar fóru þeir Davíð Eldur, Höggið Heiðar Snær og Strikerinn Árni Jó í yfirferð á stöðunni í 1. deild karla. Heiðar, sem er harður stuðningsmaður Þórs Þorlákshafnar, ræddi stöðuna á sínum mönnum áður en félagarnir fóru yfir stóru myndina: Hvaða lið eiga raunhæfan möguleika á því að tryggja sér sæti í Bónusdeildinni að ári?
Fyrirkomulag deildarinnar er einfalt en miskunnarlaust – eitt lið fer beint upp sem deildarmeistari á meðan liðin fara í harða úrslitakeppni um hitt lausa sætið.
Niðurstaða sérfræðinganna er skýr: Það eru einungis fjögur lið sem koma til greina í baráttunni um að fara upp. Önnur lið í deildinni eiga ekki raunhæfan möguleika.
Liðin fjögur sem geta farið upp
1. ÍA (Langlíklegastir)
Skagamenn eru ósigraðir á toppnum og í kjörstöðu til að fara beint upp. Átta stiga sigur þeirra gegn Þór Þ. á dögunum var risastór yfirlýsing og gefur þeim forskot í innbyrðis viðureignum. Þeir hafa sýnt mikinn stöðugleika, klárað innbyrðis leiki sína og líta út eins og sterkasta lið deildarinnar í dag. Eru líklega með besta leikmann deildarinnar innan sinna raða í Gojko Zudsum.
2. Þór Þorlákshöfn
Þórsarar eru með mannskap til að blanda sér í baráttuna, en tapið gegn ÍA gerir þeim erfiðara fyrir að taka toppsætið beint. Líklegasta leið Þórs eins og staðan er virðist liggja í gegnum úrslitakeppnina, þar sem reynslan og heimavöllurinn gætu reynst dýrmæt. Eru með besta 12 manna leikmannahóp deildarinnar, en val í erlendum atvinnumönnum virðist heilt yfir ekki vera gott og það gæti kostað þá að lokum.
3. Haukar
Hafnfirðingar eru til alls líklegir í toppbaráttunni. Eins og deildin hefur þróast eru þeir taldir mun líklegri til að tryggja sig inn í Bónusdeildina í gegnum umspilið frekar en að stela toppsætinu af Skaganum. Eru búnir að vinna leiki í upphafi tímabils, en hafa samt ekki fengið miklar prófraunir enn. Líkt og Breiðablik hér fyrir neðan þurfa þeir líklega að treysta á að detta í gang þegar hlutirnir skipta mestu máli.
4. Breiðablik
Kópavogsbúar eru næstum í sama flokki og Haukar og Þór Þ. Gæðin eru til staðar til að vinna hvaða lið sem er á góðum degi, en raunhæfasta leið þeirra á stóra sviðið er að detta í gang í vor og fara upp í gegnum úrslitakeppnina.
Þáttinn má hlusta á í spilaranum hér að ofan ásamt því að vera aðgengilegur undir nafninu Karfan á öllum hlaðvarpsveitum.
Samstarfsaðilar Körfunnar eru Bónus, Wodbúð körfubolti, Tactica, Lengjan, Kristall og Lykill.
