Slóvenska ofurstjarnan Luka Doncic segir að nýtt lið Los Angeles Lakers þurfi tíma og fleiri leiki saman til að byggja upp stöðugleika.
Lakers mátti þola 112–95 ósigur gegn Golden State Warriors í opnunarleik sínum í NBA-bikarnum á föstudagskvöld þrátt fyrir að hafa náð 25 stiga forskoti í fyrsta leikhluta. Golden State sneri leiknum hins vegar algjörlega við á lokasprettinum undir forystu Stephens Curry, sem var valinn maður leiksins með 31 stig, 6 stoðsendingar og 4 fráköst.
Doncic bar hitann og þungann af sóknarleik Lakers og skoraði 37 stig, tók 7 fráköst og gaf 5 stoðsendingar (hitti úr 12 af 27 skotum og sex af 16 þristum). Eftir leik tók hann fulla ábyrgð á tapinu en lýsti jafnframt yfir mikilli trú á nýja hópnum:
„Ég veit ekki nákvæmlega hvað þarf, augljóslega endurtekningar og bara að spila saman. Þessi leikur er gott dæmi; þeir spiluðu fasta vörn og sýndu okkur mikið, svo þetta var góður leikur fyrir okkur að læra af. Ekki góður af því að við töpuðum, en góður til að æfa þessa hluti. Þetta mun taka tíma, við erum með mikið af nýjum mönnum en ég fíla virkilega að spila með þessum strákum. Allir geta gert betur en þetta, ég fyrstur allra. Við töpum saman og vinnum saman.“
Lakers (4–2) freistar þess að rétta úr kútnum á sunnudagskvöld þegar liðið tekur á móti Toronto Raptors.
