Íslandsmeistarar Grindavíkur hafa ráðið Bandaríkjamanninn Chris Stephenson til félagsins en kappinn lék með NC Ashville Bulldogs í 1. deild háskólaboltans í Bandaríkjunum. Chris er 190 cm bakvörður en gerir oft og tíðum meiri usla inni í teig eins og segir á heimasíðu meistaranna.
Af vef umfg.is:
Íslandsmeistarar Grindavíkur í körfuknattleik hafa gengið frá ráðningu erlends leikmanns fyrir komandi átök og varð Chris Stephenson sem lék með NC Asheville Bulldogs í 1. deild háskólaboltans, fyrir valinu.
Chris útskrifaðist í fyrra og hóf tímabilið í Litháen en meiddist eftir nokkra leiki og þurfti því að snúa aftur í heimahagana. Þar lék hann í sumar í hálfatvinnumannadeild og ætti að skila sér á klakann í góðu formi.
Chris er 190 cm áður en hann stígur upp í flugvélina og verður fróðlegt að sjá hvort hann verði nokkuð fyrir hinni algengu minnkun á leiðinni yfir Atlantshafið.
Hann er titlaður bakvörður en gerir oft á tíðum mestan usla inn í teig og ætti því að vera sú týpa sem hentar vel í okkar deild.
Hann kemur á næstu dögum eða um leið og leyfin eru klár fyrir hann.
Mynd/ Chris Stephenson í leik með Asheville
