Einn leikur fór fram í Iceland Express deild kvenna í kvöld þar sem botnlið Fjölnis vann gríðarlega mikilvægan sigur á Snæfell í B-riðli deildarinnar. Fyrir leik kvöldsins var Snæfell á toppnum með 16 stig og Fjölnir á botninum með 6 stig. Þá var þetta í fyrsta sinn í sex leikjum í deildinni sem Monique Martin, leikmaður Snæfells, nær ekki 30 stigum heldur var ofurkonan aðeins með 18 stig í kvöld.
Lokatölur í Grafarvogi voru 67-56 Fjölni í vil þar sem Natasha Harris var á ný komin í liði Fjölnis eftir meiðsli og sú fann sig á heimavelli, smellti niður 31 stigi, gaf 8 stoðsendingar og tók 7 fráköst. Monique Martin gerði 18 stig fyrir Snæfell og tók 18 fráköst en í fyrstu fimm deildarleikjum sínum með Snæfell skoraði hún 30 stig eða meira í öllum leikjunum.
Fjölnir er enn á botni deildarinnar en nú með 8 stig eins og Grindavík og berjast þessi tvö lið af miklum krafti við að bjarga sér frá falli í 1. deild kvenna. Snæfell er sem fyrr á toppnum með 16 stig en takist Njarðvík að vinna Grindavík í Röstinni annað kvöld geta Njarðvíkingar jafnað Snæfell að stigum.
Mynd/ Bragi og Fjölniskonur unnu mikilvægan sigur í IEX deild kvenna í kvöld.
