Ólafur Ólafsson háloftafugl úr Grindavík og jaxl með meiru mun ekki koma til með að leika með Grindvíkingum í kvöld gegn Snæfell. Ólafur mun þurfa að játa sig sigraðan á lungnabólgu og verður því heimafyrir í þetta skiptið. “Ég vaknaði í gærmorgun hálf slappur en fór nú samt í vinnu en svo varð ég bara verri og verri og endaði með því að fara til læknis og er nú á sýklalyfjum og verð því ekki með í kvöld.” sagði Ólafur í snörpu viðtali við Karfan.is
Það verður vissulega eftirsjá hjá Grindvíkingum í erfiðum og mikilvægum útileik gegn Snæfell þar sem Ólafur er að skila tæpum 15 stig og taka 7 fráköst á leik fyrir þá gulklæddu. Grindvíkingar eru öruggir í úrslitakeppni en geta lent allt frá 8. sæti eða komist uppí það fjórða.
