Dominos deildar lið Grindavíkur hefur ákveðið að láta erlenda leikmann sinn Rashad Whack fara frá liðinu og er leit af nýjum atvinnumanni hafin. Þetta greindi Vísir.is frá fyrr í dag.
Whack endaði með 22,8 stig, 4,5 fráköst og 2,6 stoðsendingar að meðaltali í leik fyrir Grindavík en þótti ekki nægilega góður til þess að leika áfram með liðinu.
Samkvæmt Vísi er ólíklegt að Whack leiki með Grindavík í síðasta leik ársins gegn Þór Ak á fimmtudaginn og hefur hann því leikið sinn síðasta leik fyrir liðið.
Mikið hefur verið rætt um leikmanninn en Grindvíkingurinn Jón Axel Guðmundsson hefur sagt það á Twitter að hann vilji sjá hann fara. Jóhann Þór staðfesti einnig við Karfan.is í síðustu viku að þreyfingar hefði átt sér stað en ekkert væri klárt í þeim málum.
Samkvæmt Vísi.is hefur ekki verið samið við nýjan leikmann en Lewis Clinch Jr. hefur verið orðaður við liðið en hann lék með þeim á síðustu leiktíð.
