Í kvöld klárast deildarkeppni Dominos deildarinnar tímabilið 2017-18. Merkilegt tímabil fyrir margar sakir. Ekki síst þær að Valur heldur sæti sínu í deildinni eftir að hafa komið upp úr 1. deildinni fyrir tímabilið. Sem stendur er liðið í 10. sæti deildarinnar, með 14 stig eftir 21 leik spilaðan, heilum 8 stigum frá fallsæti og var það öruggt með sæti sitt á komandi leiktíð fyrir nokkrum umferðum.
Um afrek að ræða fyrir félagið, sem ekki hefur haldið sæti sínu í deildinni (eftir að hafa komið upp) síðan árið 1998. Það árið, líkt og nú, hélt liðið sér uppi, en komst þó ekki í úrslitakeppnina.
Vert er að skoða hversu mikill tími er liðinn síðan, en á þeim tíma sem þetta átti sér stað síðast var það Svali Björgvinsson sem þjálfaði liðið og meðal annarra var Ívar Webster ennþá leikmaður. Núverandi þjálfari þeirra, Ágúst Björgvinsson, starfaði það árið sem þjálfari 7. og 8. flokks félagsins.
Hérna má sjá skemmtilegt viðtal við Svala úr Valsblaði ársins 1998.
Hér fyrir neðan má sjá nokkra aðra áhugaverða hluti sem einnig voru í umræðunni þegar að Valur hélt sæti sínu síðast í deildinni:
Þessi útgáfa af iMac var vinsæl
Titanic vann til 11 Óskarsverðlauna
Hvalfjarðargöngin voru opnuð
TQ gaf út smáskífuna Westside
Keikó flutti til Vestmannaeyja
Davíð Oddsson var forsætisráðherra
Playstation var ennþá á sinni fyrstu útgáfu
Urald King var 7 ára
