Leikmenn liðanna í Dominos deildunum eru þessa dagana í nokkru fríi enda stutt síðan deildinni lauk. Það er þó ekki mikið frí sem Brynjar Þór Björnsson leikmaður KR tók sér í sumar. Líkt og Karfan greindi frá hefur hann verið á ferðalagi með körfuboltabúðirnar sínar sívinsælu.
Mbl.is greindi hinsvegar frá því í morgun að Brynjar hefði orðið fyrir því óhappi að meiðast fyrir stuttu. Brynjar sem lék með Tindastól á síðustu leiktíð en endurkoma hans til KR var staðfest fyrir stuttu mun hafa fótbrotnað.
Í samtali við MBL.is segir Ingi Þór Steinþórsson þjálfari KR: „Hann var bara að leika sér í körfu þegar þetta gerðist. Það kom í ljós nokkrum dögum síðar að það var brot í beini í sköflungnum. Hann hélt í fyrstu að hann hefði bara snúið sig á ökklanum en svo kom í ljós að þetta var brot. Hann verður frá í fjórar til sex vikur og það er ljóst að hann mætir eitthvað seinna til æfinga en aðrir leikmenn,“
Brynjar gekk til liðs við Íslandsmeistara síðustu sex ára, KR á dögunum ásamt bræðrunum Matthíasi Orra og Jakobi Erni Sigurðarsonum. Liðið er því ansi vel mannað og líklegt til að gera tilkall að sjöunda titlinum á sjö árum.
