Draumakvöld New York Knicks, þegar meistarafáni félagsins var loks dreginn að húni í Madison Square Garden, tók vandræðalega stefnu bak við tjöldin. Þótt leikmenn hafi stoltir sýnt glæsilega meistarahringa sína við mikinn fögnuð, fengu aðstoðarþjálfarar liðsins afhenta tóma skartgripabauka og margir starfsmenn hallarinnar munu samkvæmt fréttum alls ekki fá hring.
Samkvæmt heimildum Joe Vardon hjá The Athletic komust aðstoðarþjálfarar liðsins að því fyrr um daginn að þeir fengju ekki hringana sína afhenta þetta kvöld, meðal annars vegna þess að ekki hafði einu sinni farið fram mæling á fingrum þeirra. Til að láta athöfnina líta vel út fyrir framan áhorfendur og sjónvarpsmyndavélar voru þeim hins vegar réttir hringabaukar á miðju gólfinu – sem reyndust vera innantómir. Þá herma sögusagnir að aðalþjálfarinn Mike Brown hafi sömuleiðis farið tómhentur af athöfninni.
Enn undarlegra mál snýr að almennum starfsmönnum Madison Square Garden, sem jafnan fá minni útgáfur af meistarahringum hjá flestum félögum. Í september síðastliðnum fengu starfsmenn sendan tölvupóst þar sem þeim var óskað til hamingju með meistaratitilinn og boðið að velja á milli tveggja mismunandi hönnunarforma á vegum MSG. Gleðin stóð hins vegar stutt yfir, því tölvupósturinn reyndist vera svonefnd „veiðihermun“ (e. phishing simulation) frá öryggisdeild félagsins til að kanna hvort starfsmenn féllu fyrir svikapóstum. Þeir sem smelltu á hlekkinn til að velja hringinn sinn voru umsvifalaust skikkaðir á skyldunámskeið í netöryggi að kröfu eigandans James Dolan.
