Körfuknattleikssamband Íslands (KKÍ) hefur tryggt sér nýjan bakhjarl en sambandið og drykkjarvöruframleiðandinn Sprite hafa undirritað samstarfssamning sem gildir út árið 2029.
Samkvæmt tilkynningu frá KKÍ felur samkomulagið í sér að vörumerkið verður áberandi á helstu viðburðum sambandsins á næstu þremur árum. Þar á meðal er sýnileiki á leikjum A-landsliða karla og kvenna, á miðlum sambandsins og í kringum VÍS-bikarvikuna. Fram kemur að markmiðið sé að byggja á alþjóðlegri tengingu vörumerkisins við götukörfubolta og ungmennamenningu til að efla upplifun iðkenda og áhugafólks hér á landi.
Hannes S. Jónsson, framkvæmdastjóri KKÍ, fagnar nýjum samstarfsaðila og bendir á sögu vörumerkisins innan íþróttarinnar: „Við erum ótrúlega spennt að vinna með SPRITE enda er sá drykkur með sterkar körfuboltatengingar í sögulegu samhengi. Við leitumst alltaf eftir því að vinna með aðilum sem gefa mikið af sér sem á sannarlega við í þessu tilviki.“
Af hálfu samstarfsaðilans segir Atli Sigurður Kristjánsson, framkvæmdastjóri markaðssviðs Coca-Cola á Íslandi, að markmiðið sé að ná til samfélagsins í kringum íþróttina fremur en að einskorðast við hefðbundnar auglýsingar: „Körfubolti snýst ekki bara um það sem gerist inni á vellinum, heldur líka um menninguna, orkuna og samfélagið í kringum íþróttina. Sprite hefur lengi verið hluti af þeirri menningu á alþjóðavísu og okkur finnst spennandi að styrkja þau tengsl hér á Íslandi. Við viljum vera meira en merki á auglýsingaskilti og hlökkum til að vinna með KKÍ að því að skapa skemmtilega upplifun fyrir körfuboltaáhugafólk um allt land.“
