ÍR lagði nýliða Ármanns í Skógarseli í kvöld í fimmtu umferð Bónus deildar karla, 96-83.
Eftir leikinn er ÍR um miðja deild með þrjá sigra og tvö töp á meðan Ármann er í 12. sætinu, enn án sigurs eftir fyrstu fimm umferðirnar.
Þrátt fyrir að sigur ÍR hafi að lokum verið nokkuð öruggur í leik kvöldsins leit það þó ekki alltaf út fyrir að svo yrði. Ármann leiðir með sex stigum eftir fyrsta leikhluta og þremur stigum í hálfleik.
Hægt og bítandi ná heimamenn svo tökum á leiknum í seinni hálfleiknum. Leiða mest með sjö stigum í þriðja fjórðung og 16 stigum í þeim fjórða áður en þeir klára leikinn með nokkuð öruggum 13 stiga sigri.
Stigahæstur heimamanna í kvöld var Jacob Falko með 30 stig og Hákon Örn Hjálmarsson bætti við 19 stigum.
Fyrir Ármann voru stigahæstir Bragi Guðmundsson með 30 stig og Lagio Grantsaan með 15 stig.
