Hér fyrir neðan eru nokkur af þeim atriðum sem Körfunni hafa borist til eyrna á síðustu dögum er varða leikmenn, þjálfara og félög á Íslandi. Tekið skal fram að hér er um að ræða óstaðfestar fregnir og því ber að taka þeim sem slíkum.
- Þjálfaramál Keflavíkur eru mikið í umræðunni þessa dagana, en nýjasta nafnið sem rætt er um fyrir karlalið félagsins er Benedikt Guðmundsson þjálfari Tindastóls.
- Júlíus Orri Ágústsson leikmaður Íslandsmeistara Stjörnunnar er sagður líklegur til að yfirgefa Garðabæinn í sumar, en líklegir áfangastaðir eru taldir Höttur á Egilsstöðum eða uppeldisfélag hans í Þór á Akureyri.
- Leikmaður ársins í fyrstu deildinni Friðrik Anton Jónsson er sagður líklegur til að framlengja við KR eftir að viðræður hans við ÍA og Breiðablik sigldu í strand.
- Kristján Fannar Ingólfsson leikmaður Stjörnunnar er sagður líklegur til að halda heim í heimahagana í Keflavík fyrir næsta tímabil eða reyna fyrir sér á meginlandinu.
- Skagfirðingurinn Reynir Bjarkan er samkvæmt orðinu að ákveða sig hvort hann taki stökkið upp í efstu deild með ÍA eða haldi áfram með Þór Akureyri.
- Þór Akureyri eru sagðir hafa átt í viðræðum við Keflvíkinginn Arnór Daða Jónsson og þjálfara Laugdæla Florian Jovanov um að taka við liðinu fyrir næstu leiktíð.
- Friðrik Heiðar Vignisson leikmaður Sindra er samkvæmt orðinu á götunni á leiðinni til liðs við Amager í dönsku úrvalsdeildinni.
- Samkvæmt orðinu á götunni er Danielle Rodriguez mögulega á heimleið eftir eitt gott tímabil í Sviss, líklegir áfangastaðir eru taldir Njarðvík, Grindavík eða Haukar.
- Grindavík er einnig orðaðar við leikmann Hamars/Þórs Abby Beeman.
- Shaquille Rombley er sagður líklegur til að endursemja við Íslandsmeistara Stjörnunnar, en bæði KR og Álftanes höfðu víst einnig áhuga á að semja við hann.
- Þá er leikmaður KR á síðasta tímabili Linards Jaunzems sagður nokkuð eftirsóttur, líklegast telja gárungar að hann verði áfram í Vesturbænum, en samkvæmt orðinu á götunni hafði fjöldi liða áhuga á að semja við hann, þar á meðal ÍR, Þór Þorlákshöfn, ÍA og Njarðvík.
- Ólafur Gunnlaugsson er samkvæmt orðinu á götunni með tilboð á borðinu frá bæði ÍA og ÍR, fari svo hann ákveði að yfirgefa Þór Þorlákshöfn
- Þór í Þorlákshöfn eru sagðir stórhuga fyrir komandi tímabil, en félagið er sagt hafa augastað á Ægi Þór Steinarssyni nýkrýndum Íslandsmeistara Stjörnunnar og Sigurði Péturssyni úr Keflavík.
- Þá er Kristinn Pálsson einnig sagður á lista Þórs, en ekki er talið líklegt að hann hlusti á tilboð þeirra þar sem hann ersamkvæmt orðinu harðákveðinn í að halda áfram hjá bikarmeisturum Vals.
- Þá eru bikarmeistarar Vals sagðir vilja semja aftur við Justas Tamulis.
- Landsliðsmaðurinn Styrmir Snær Þrastarson er sagður vera með tilboð á borðinu frá bæði Keflavík og Tindastól í Bónus deildinni.
- Leikmaður Hamars Ragnar Ágúst Nathanaelsson er ennþá talinn líklegur til þess að leggja skóna á hilluna. Fari svo að hann haldi áfram er hann þó sagður líklegur til þess að taka fund með nýliðum Ármanns í Bónus deildinni.
- Lore Devos leikmaður Íslandsmeistara Hauka er sögð nokkuð eftirsótt fyrir komandi tímabil í Bónus deild kvenna. Líklegast þykir að hún verði áfram í Hafnarfirðinum, en einhverjar sögur eru að nýliðar KR vilji fá hana til liðs við sig.
- Fyrrum landsliðskonan Hallveig Jónsdóttir er sögð vera íhuga að draga fram skóna á nýjan leik, en líklegur áfangastaður fyrir hana fari svo er hjá nýliðum KR.
Orðið á götunni er einungis til gamans og ef fólk hefur ábendingar um slúður skal hafa samband á [email protected]
