Warriors létu rigna í Miami

Níu leikir fóru fram í NBA deildinni í nótt, Cleveland lagði Orlando í framlengingu, Golden State náði í útisigur á heimavelli meistara Miami, Brooklyn lagði Oklahoma á útivelli og Knicks unnu Spurs…og flestir NBA áhangendur hafa vafalítið nuddað stýrurnar að minnsta kosti þrisvar til fjórum sinnum úr augum sínum því á dauða okkar áttum við von fremur en mörgum af þessum úrslitum næturinnar.

 

 

Ekkert lið hefur til þessa gert 123 stig á Miami þetta tímabilið en sú varð raunin í nótt. Stephen Curry bauð upp á 8 af 15 í þristum og kláraði með 36 stig og 12 stoðsendingar. LeBron James gerði svo 26 stig, tók 5 fráköst og gaf 5 stoðsendingar í liði Miami. Sigur Warriors var sá áttundi í röðinni og er liðið á lengstu samfelldu yfirstandandi sigurgöngunni í NBA deildinni um þessar mundir.

 

Vafalítið stærsti sigur Knicks á tímabilinu! Melo mættur aftur og splæsti í tvennu með 27 stig og 12 fráköst. Þá var Iman Shumpert einnig með 27 stig hjá Knicks. Marco Belinelli var atkvæðamestur hjá Spurs með 32 stig.

 

Bobcats eygðu ekki mikla von fyrir leikinn gegn Portland og þegar heimamenn jörðuðu 21 þrist þá var þetta búið spil. Portland varð einnig í nótt fyrsta lið NBA deildarinnar frá upphafi til að skora 20 þrista eða meira í tveimur leikjum á leiktíð. Þá jafnaði Portland félagsmetið sem er 21 þristur í leik. Chris Douglas-Roberts gerði 20 stig hjá Bobcats en Wesley Matthews var með 25 stig í liði Portland.