11:26
{mosimage}
(Jón Arnór hefur verið í byrjunarliðinu í síðustu tveimur leikjum)
Úrslitakeppnin á Ítalíu hófst í gær þar sem Armani Milano og gamla lið Jón Arnórs Stefánssonar, Lottomatica Roma, unnu leiki sína og leiða 1-0. Jón Arnór og félagar í Benetton Treviso hefja leik í kvöld á heimavelli gegn La Fortezza Bologna en Benetton höfðu betur gegn Bologna í síðustu umferð deildarinnar og tryggðu sér þannig heimavallarréttinn í fyrstu umferð úrslitakeppninnar.
Liðin mætast kl. 20:30 að staðartíma eða kl. 18:30 að íslenskum tíma og verður leikurinn í beinni útsendingu á Sky Sport 2. Þá mætast topplið Siena og Scavolini Pesaro á sama tíma en Siena hafði mikla yfirburði í deildinni þetta tímabilið og varð deildarmeistari með 58 stig eða 18 stigum meira en Lottomatica Roma sem hafnaði í 2. sæti.
Jón Arnór er búinn að leika tvo deildarleiki á Ítalíu og í báðum leikjunum var hann í byrjunarliðinu. Fyrsti leikur Jóns á dögunum var á heimavelli Benetton þar sem þeir lögðu Banca Tercas Teramo 85-82. Jón var í byrjunarliðinu og gerði 2 stig á 21 mínútu og gaf 1 stoðsendingu. Aftur var Jón í byrjunarliðinu gegn La Fortezza Bologna í síðustu umferðinni og gerði þá 2 stig á 10 mínútum og var með eina stoðsendingu. Í þessum tveimur leikjum hefur Jón tekið fjögur þriggja stiga skot en ekkert þeirra hefur ratað rétta leið.
Það lið í fyrstu umferð úrslitakeppninnar sem fyrr vinnur þrjá leiki kemst áfram í undanúrslitin. Benetton mætir því Bologna í kvöld, aftur 21. maí og þriðja viðureign liðanna fer fram 23. maí. Leikur 4 ef með þarf er 25. maí og leikur 5 ef þar verður 27. maí.
Mynd: www.benettonbasket.it
